"Un proxecto transformador, un presidente para a nosa Nación"

Alberte Ansede, secretario de Organización do BNG, presentou esta mañá en rolda de prensa o cartaz e o calendario da Asemblea Nacional Extraordinaria que escollerá o candidato nacionalista á presidencia da Xunta. O único candidato que se presenta é Anxo Quintana. Ansede asegurou que este acto será "a culminación do proceso asemblear máis participativo da historia do BNG". "Nunca tantos militantes nacionalistas se implicaron nos debates e toma de decisións relativos a unha asemblea deste tipo", afirmou.
A candidatación de Anxo Quintana foi avalada por 3.332 militantes; máis de 2.500 persoas participaron nas asembleas comarcais para perfilar as propostas políticas e elixir os 1.500 delegados e delegadas que participarán na Asemblea do día 5. Ansede destacou que haberá un 41% de delegadas entre os asistentes.

Así, mesmo, destacou a formación de candidaturas de integración, candidaturas únicas, en todas e cada unha das asembleas comarcais, así como o "apoio masivo da militancia que sobrepasa, no seu conxunto, o 95 por cento dos votos emitidos".
Un proxecto transformador
Segundo Ansede, "o lema da Asemblea Nacional Extraordinaria resume acaidamente o espírito deste grande encontro do nacionalismo galego: un proxecto transformador, un presidente para a nosa Nación".
Resaltou o carácter de "forza política transformadora e diferente" do BNG, que "mesmo se plasma no contido desta Asemblea: somos a única forza política que eliximos o candidato nun proceso aberto á militancia" e resaltou que o BNG, "ademais de perseguir a xestión eficaz dos recursos públicos, quere ir máis aló introducindo cambios positivos no marco político e económico para poñelos ao servizo das maiorías sociais e dos intereses galegos".

Así mesmo, resaltou o carácter de "alternativa sólida e fiábel ao bipartismo estatal" do nacionalismo galego, que "non ten que pedir permiso a Madrid para existir e ten en Galiza o seu centro de decisión".
Un presidente nacionalista
"O BNG concurre ás próximas eleccións coa vontade de acadar os apoios suficientes para materializar integramente o seu programa de goberno e, polo tanto, situármonos ao fronte do goberno e do país; isto é: un goberno galego cun presidente nacionalista", asegurou o secretario de organización do BNG.
Nesa liña, reiterou que "demostramos nesta lexislatura que estabamos preparados para gobernar e para ser o motor do Goberno". "Coido que conquistamos a confianza de sectores até agora distantes do nacionalismo galego e reforzamos a simpatía que xa sentían por nós centos de miles de galegos e galegas: é o momento de que o País dea un paso na confianza en si mesmo e na confianza nunha forza política propiamente galega como o BNG", afirmou.
A Asemblea Nacional celebrarase no Palacio de Congresos de Santiago de Compostela este domingo 5.

Proceso de elección do candidato do BNG á presidencia da Xunta de Galiza

Rematado o prazo de presentación de candidaturas para o proceso de elección de Candidato do BNG á Presidencia da Xunta na Asemblea Nacional Extraordinaria, foi presentada unicamente a candidatura de Anxo Quintana, que resultou proclamada ao contar co aval de 3.332 afiliados/as ao BNG de pleno dereito e superar o mínimo de 300 requirido regulamentarmente.
A continuación procedemos a difundir a información facilitada pola candidatura presentada, de acordo co establecido polo Regulamento da Asemblea Nacional Extraordinaria do BNG, preme no seguinte enlace para velo!!!!

POR UN BNG MÁIS FORTE NUN GOBERNO CON PRESIDENTE NACIONALISTA

Anxo Quintana é xa o primeiro político galego en ter vídeoblog

Quin.tv será o enderezo do primeiro vídeoblog co que vaia contar na rede un político galego. A sociedade galega contará, xa que logo, cunha ferramenta de comunicación directa co portavoz nacional do BNG, Anxo Quintana.
Segundo afirmou na presentación oficial do blog a secretaria de comunicación do BNG, María Xosé Bravo, esta é unha proba máis de que “nacionalismo e modernidade van unidos en Galiza”. Lembrou que Quintana xa dispón dun blog na rede no que vén “pendurando” as súas reflexións con regularidade desde antes da campaña das eleccións autonómicas do 2005, http://www.falaconquin.com/.
Bravo recordou outros elementos indicativos da forte presenza do BNG na rede, como o éxito da canle en Youtube www.youtube.com/telebng, que multiplica por catro o número de visitas sobre a do PPdeG e por 10 sobre a do PPdeG. Tamén lembrou que é a canle máis vista e con máis suscriptores entre as organizacións nacionalistas do Estado español, por diante de Convergència i Unió; Esquerra Republicana de Catalunya ou do EAJ-PNV.
Quintana conta con blog escrito desde antes das autonómicas do 2005

Lembrou tamén que numerosos cargos institucionais do BNG manteñen e actualizan con frecuencia diversos cadernos dixitais, como Bieito Lobeira, Santi Domínguez, Paz Abraira ou Xosé Anxo Laxe, entre outros.
Un vídeo-blog que se actualizará con frecuencia case diaria
Este vídeo-blog -elaborado pola empresa “A navalla suíza”- pretende ir moito máis alá dunha simple colección de clips de vídeo e promover a participación dos usuarios, que poderán non só deixar os seus comentarios senón tamén enviar os seus propios vídeos con preguntas para Anxo Quintana. Ademais, preténdese mostrar unha idea do traballo cotiá do portavoz nacional e vicepresidente do goberno galego; xunto coa súa faciana máis persoal. Por exemplo, os visitantes poden consultar unha longa e interesante conversa entre Antón Reixa e Quintana.

Convención Nacional do BNG sobre as eleccións Xerais!!!!!

O BNG anuncia a creación de fondos de emerxencia nos concellos para atender as vítimas da violencia de xénero

O BNG PIDE A NULIDADE DAS BASES DE CONVOCATORIA DUNHA PRAZA DE PEÓN

O BNG de Pantón ven de presentar un recurso de reposición solicitando a nulidade das bases de convocatoria dunha praza de operario de servizos múltiples.
Neste recurso solicítase a nulidade das bases pola participación do alcalde no tribunal de selección xa que vulnera o Estatuto Básico do Empregado Público que ven a establecer a composición dos órganos de selección e a incompatibilidade do alcalde con formar parte do Tribunal Calificador para a selección da praza.
O recurso tamén se opón á pretensión do alcalde do PP de Pantón de facer unha proba sobre coñecemento dos servizos de auga, saneamento e alumeado do Concello de Pantón o que vulnera o principio de igualdade posto que estos coñecementos resultarían imposibles de acadar para alguén que non esté na brigada de obras do concello ou que non esté ou estivera vinculado contractualmente co concello e que provocaría unha inxustificada discriminación positiva a favor destes, ademais de poder especular que o PP pretende dar a praza a dedo.

Finalmente, o BNG alega contra a puntuación por semellar facelo para favorecer a algunha persoa en particular e vulnerar así tamén os principios de igualdade, mérito e capacidade.

O portavoz municipal do BNG no concello de Pantón, Xesús Álvarez Goianes, manifestou ademais que ‘resulta de escándalo, por outra parte, a falta de publicidade que se lle está a dar a esta convocatoria, o que fai pensar que o PP quere enchufar a algunha persoa.’ O mesmo engadiu ‘agardemos que este recurso sexa estimado e se poidan presentar todas as persoas que o desexen, e pasen as probas con igualdade, o mérito e a capacidade que se lles supón’.

*nota de prensa Voz de Galicia

Vicepresidencia implantará en Galiza o servizo galego de apoio á mobilidade persoal, o 065 social, destinado a persoas dependentes ou con discapacidad

O Consello da Xunta autorizou na súa xuntanza de hoxe o proxecto de decreto polo que se regula o Servizo Galego de Apoio á Mobilidade Persoal, destinado para as persoas dependentes e/ou con discapacidade.

Este novo servizo público de carácter social promovido pola Vicepresidencia da Xunta facilitará o desprazamento programado e non urxente das persoas con problemas de mobilidade, sempre baixo condicións de máxima seguridade, cos medios precisos e co apoio de persoal de acompañamento durante o traslado.
Segundo se establece no decreto, para acceder a este servizo será necesario ter recoñecida a existencia de dificultades de mobilidade que impidan a utilización de transportes públicos, atoparse nunha situación de dependencia ou ter recoñecido un grao de minusvalía superior ao 65 por cento. As persoas que cumpran un destes requisitos disporán dunha tarxeta identificativa e poderán beneficiarse desta iniciativa para cubrir así as súas necesidades básicas de desprazamento.

A determinación da porcentaxe de participación dos usuarios no financiamento do servizo virá determinada pola capacidade económica persoal do solicitante, sendo o servizo gratuíto para as persoas con ingresos iguais ou inferiores ao 75% do IPREM.

A prestación do Servizo Galego de Apoio á Mobilidade Persoal realizarase en función dunha serie de prioridades, como son a necesidade de acudir a consultas ou tratamentos sanitarios do sistema público, cando o desprazamento non sexa competencia do sistema sanitario; trasladarse a centros ou equipamentos do sistema de servizos sociais como residencias, centros de día ou outros equipamentos de aloxamento temporal ou permanente dos que sexan usuarios; acudir a centros ou equipamentos do sistema de servizos sociais que, non tendo carácter de aloxamento, dispoñen de programas ou actividades ás que acoden ou deban acudir como usuarios; realizar actividades relacionadas coa vida diaria autónoma e co seu desenvolvemento persoal; ou asistir a actividades de carácter educativo ou formativo.

A través desta orde de prioridades, na que tamén se ten en conta a idade dos solicitantes, a Vicepresidencia da Xunta pretende poñer a disposición das persoas con discapacidade e/ou dependentes os medios axeitados para facilitarlle a mobilidade, ao tempo que se garante o seu acceso en igualdade de condicións a servizos de calquera tipo, favorecendo así a súa plena integración e participación no seu contorno habitual. O obxectivo é implantar de xeito progresivo a prestación deste servizo a través de diversas experiencias piloto que poderán comezar neste ano, de xeito que a finais do ano 2009 o servizo funcione con normalidade en todo o territorio galego.

O custo da progresiva implantación deste servizo ascende a 61.404.966,63 euros, que se distribuirán en tres anualidades. Unha vez implantado, o custo anual consolidado do mesmo ascenderá a 33.669.163,53 euros.

Condicións e seguridade

O Servizo Galego de Apoio á Mobilidade Persoal procurará adaptarse, na medida do posible, á demanda de desprazamento do usuario. Así, cando os usuarios precisen da realización dun desprazamento que estea cuberto por este servizo deberán contactar con antelación coa unidade competente, indicando o seu número de tarxeta de usuario e as circunstancias que sexan necesarias para a organización do servizo. Durante os traslados os usuarios disporán dunha persoa que os acompañará para prestarlle o apoio necesario durante o percorrido. Os vehículos empregados cumprirán a normativa de accesibilidade e supresión de barreiras e estarán adaptados para o transporte de persoas en cadeiras de rodas. Ademais, terán unha capacidade mínima de sete persoas e máxima de doce prazas de configuración mixta, de xeito que permita unha acomodación flexible ás necesidades do servizo. Como novidade, os vehículos estarán dotados de teléfono e integraranse nun sistema de control e localización GPS.

Manifestación Día da Patria 07

O coordinador da Executiva do BNG, Francisco Jorquera, e mais o secretario de Imaxe e Propaganda, Mario López Rico, apresentaron hoxe en rolda de prensa en Santiago de Compostela os actos do Día da Patria 2007, que este ano se desenvolverán baixo o lema "A Forza que fai País".
Francisco Jorquera explicou que o elección do lema quere expresar que "o BNG sempre estivo na vangarda da reivindicación dos dereitos nacionais de Galiza, impulsando o autogoberno e contribuíndo a artellar a sociedade galega". Neste sentido, subliñou que "agora que o BNG ten responsabilidades de goberno na Xunta, nos concellos e noutras institucións relevantes do País "o que está a facer o nacionalismo é por as institucións ao servizo da construcción nacional de Galiza".

Aumentar o poder do nacionalismo galego en Madrid

Francisco Jorquera marcou como retos do BNG a partir deste 25 de xullo "incrementar sustancialmente a afiliación, facendo do BNG unha organización máis aberta á participación da sociedade galega, e dotar de máis forza ao BNG na política estatal para que os intereses de Galiza sexan defendidos como se merece". Por último, o coordinador da Executiva do BNG avanzou que "agardamos unha asistencia masiva tanto á manifestación como ao Festigal e unha presenza moi relevante de organizacións progresistas e nacionalistas de todo o mundo".

Simbolizar a necesidade de que Galiza poida decidir e a esperanza no futuro

Pola súa parte, o secretario de Imaxe e Propaganda da Executiva do BNG, Mario López Rico, tamén explicou que o lema do Día da Patria 2007 "quere salientar a necesidade de que Galiza teña forza para estar presente nas institucións do Estado e de Europa". En definitiva, capacidade para defender os nosos intereses, "que só pode garantir unha presenta forte do BNG".

Finalmente, Mario López Rico asegurou que a elección dunha moza coa bandeira galega para o cartaz do Día da Patria "simboliza a aposta polo futuro do país".

A Executiva Nacional do BNG celebra que as e os nacionalistas cubrisen a práctica totalidade dos seus obxectivos nas municipais 07

A Executiva Nacional do BNG reuniuse esta tarde para avaliar os resultados obtidos pola frente nas eleccións municipais celebradas onte.
O órgao executivo do BNG celebrou que a formación nacionalista cubrise a práctica totalidade dos obxectivos cos que enfrentaba este proceso eleitoral: duplicar as alcaldías, incrementar sustancialmente o número de concelleiros e concelleiras, estender o cambio galego ás administracións locais e colocarse en disposición de acceder ao goberno das sete cidades.

“O BNG é unha forza de goberno útil para Galiza e vai demostrar o seu valor para garantir nos concellos estabilidade, gobernabilidade e unha xestión limpa e ao servizo das grandes maiorías sociais”, aseverou durante a reunión da Executiva Nacional o portavoz nacional do BNG, Anxo Quintana.

Capacidade de interlocución“A diferenza do PP, o BNG ten unha probada capacidade de interlocución e vai pór esa capacidade ao servizo dos veciños e das veciñas. Nós somos capaces de chegar a acordos positivos para, sobre base programática, garantir a estabilidade e gobernabilidade dos concellos”, afirma Quintana."Os cidadáns dixeron non ás maiorías absolutas e si aos gobernos de coalición"

A respecto dos pactos posteleitorais, a Executiva Nacional considera que, en palabras do portavoz nacional, “os cidadáns dixeron claramente que non queren maiorías absolutas, senón que queren gobernos de coalición. O BNG, como non podía ser doutro xeito, vai atender ese requerimento da sociedade galega”. “Se os cidadáns quixesen gobernos monocores que se autotitulan como gobernos de progreso terían votado por unha soa forza política. Non foi así. O que os cidadáns queren son gobernos plurais, de coalición entre nacionalistas e socialistas, gobernos que tendo dous referentes políticos distintos e claros actúen coordenadamente en función dun programa previamente acordado”, conclúe Quintana.

Nota de agradecemento do candidato do BNG de Pantón.

A case que 24 horas do remate do proceso electoral e despois de analizar os resultados acadados polas diferentes forzas políticas que concurrían as eleccións no noso concello quixera agradecer en primeiro lugar a confianza que despositaron na nosa candidatura as 271 persoas que no día de onte apoiaron ao BNG de Pantón, o que supón un aumento porcentual dun 80 % con respecto ao 2003 e entrar de novo na corporación municipal.

Quero agradecer o traballo e esforzo de todos os integrantes da candidatura por achegar aos veciños e veciñas o proxecto de goberno que o Bloque Nacionalista Galego ten para este concello e moi especialmente dos candidatos que na campaña electoral sufriron tráxicas circunstancias familiares. Aunque de seguro haberá razóns sobradas para facer autocrítica, e sen dúbida farase, estou profundamente orgulloso tanto dos nosos candidatos como dos nosos votantes, porque sei que no caso dos primeiros non os movía outra motivación que a de chegar a ter un goberno que posibilitara traer importantes proxectos para Pantón e sacalo do estado de abandono no que se atopa e no caso dos segundos por non sucumbir a razóns que non estiveran baseadas na argumentación, o diálogo e explicación dun programa de goberno capaz de resolver os principias problemas de Pantón. Tratamos en todo momento de levar a ética a campaña electoral e penso que o conseguimos sobradamente aunque sabíamos que outras formas pouco éticas e democráticas de afrontar a campaña electoral podían obter resultados moitos mellores, como finalmente así foi.

O Bloque Nacionalista Galego de Pantón seguirá a traballar desde a oposición con ética, gañas e ilusión.

Un saudo nacionalista.

Suso Álvarez Goianes.

Concellos pensados para ti. Para que Pantón avance, vota BNG . Vota SUSO

Abarrote no mitin do BNG de Pantón

Nin carretaxe, nin pinchos nin orquestras fixeron falla para que o BNG de Pantón enchera o salón de actos do edificio-sociocultural de Ferreira no seu mitin. Máis de 150 persoas interesadas por o proxecto que o BNG ten para o concello asistiron ao mítin e unhas 40 tiveron que permanecer de pé por falla de asento. Persoas que saben que as solucións para os problemas dun concello coma o de Pantón pasan por un programa serio e creíbel e non por cacicadas practicadas en tempo electoral.

Nova da Voz de Galicia

Nota de prensa os medios de comunicación sobre a guerra dos bancos en Pantón

O Bloque Nacionalista Galego de Pantón denuncia no seu voceiro informativo do mes de maio, que se está a distribuír polos domicilios de Pantón, e co título do artigo de “A guerra dos Bancos de PP e PSOE”, a utilización de bancos como argumento electoral por parte do Partido Popular de Pantón e pola Agrupación Independiente-Socialista. Estamos acostumados ao reparto de formigón ou puntos de luz nas semanas previas as campañas electorais por parte do Partido Popular, como proba da súa política baseada unicamente no electoralismo, pero é novo que un partido ou agrupación como neste caso a agrupación Independiente-Socialista reparta desde a oposición bancos de fundición en varias parroquias chegando ao despropósito de poñer un banco onde xa o goberno do Partido Popular ven de poñer outro. O partido Independiente-Socialista de Pantón debería dar explicacións de cal é o orixe destes bancos e se os fondos electorais para os partidos políticos, no caso de Pantón, se están adicando á compra destes bancos, ou se comparten a visión da xestión dos concellos igual que a dereita máis antiga e caciquil. Referímonos ao final dese artigo a que o compromiso do BNG solo é cos veciños e veciñas de Pantón e os valores éticos que queremos levar á xestión do goberno do concello, obrígannos a poñer en evidencia as políticas clientelares e caciquís que se produzan, independentemente das siglas dos partidos que as amparen.
Na foto: O candidato do BNG e outro membro da candidatura posan diante dos modelos de bancos do Partido Popular e da coalición Independiente-Socialista.

Mitin do BNG de Pantón

Programa de Goberno do BNG para Pantón

EMPREGO: Compromiso coa Consellería de Vivenda e Solo para por en marcha o Polígono Industrial de Ferreira dada a imposibilidade de facelo por parte da Diputación. Cursos de formación ocupacional, escolas obradoiro, obradoiros de emprego, fomento de cooperativas e empresas de economía social mediante apoio técnico a súa constitución e subvencións ao inicio de actividade, todo elo co asesoramento e a información dun técnico local de emprego. Difusión das innovacións e novas tecnoloxías entre o tecido empresarial e comercial en horarios que lles permitan a súa asistencia e aproveitar os plans europeos para políticas de desenvolvemento económico e emprego no rural. Para política de emprego que constitue unha prioridade para o BNG destinarase ata un 30 % dos orzamentos do concello.

COMERCIO: Asesorar aos comercios interesados en acollerse as axudas da Consellería de Innovación e Industria para a modernización dos comercios rurais, así como as destinadas a bares e restaurantes para o mesmo fin. Campañas de consumo no comercio local en colaboración con éstes e de tapeo cos bares do concello en temporadas de baixa actividade.

TURISMO: Poñer en valor os recursos turísticos de xeito integral e transversal (paisaxe, medio ambiente, identidade cultural…). En colaboración cos axentes privados do sector e coas outras administracións, elaboración de planos de formación turística, muncipais, comarcais ou supracomarcais.
Integrar a oficina de turismo na rede galega de oficinas turísticas que permita unha información mellor e máis coordinada aos usuarios. Incluir na páxina web do concello ligazóns a todas as empresas relacionadas co turismo, ocio e aventura existentes no concello e apoio dende a administración local ás mesmas. Mantemento e sinalización en bo estado das rotas de sendeirismo e a cabalo e estudar habilitar outras. Un novo pulo a feira do viño, apoio ao festival do castro e implantación en colaboración coa hostelería local dunha festa gastronómica anual. Adquisición e rehabilitación do Poboado da Chaira para campamentos de verán en colaboración coas Consellerías de Vivenda e Solo, Turismo e Medio Rural. Hablitación e novo pulo ao embarcadoiro de A Maiorga e rehabilitación integral de lugares de especial interés como Reiriz ou San Cosmede.

PARROQUIAS: Recoñecemento das parroquias como unidade de organización e de participación no ámbito municipal e elección democrática de alcalde-pedáneo como interlocutor das parroquias co concello. Dotación de servizos básicos como abastecemento de auga e saneamento a través dun calendario pactado cos representantes veciñais, as consellerías competentes e a propia diputación e non segundo a discrecionalidade que ata de agora se seguía en base a criterios electoralistas e clientelares. Axudas as diferentes asociacións veciñais e culturais legalmente constituídas e en funcionamento en base as actividades que estas realicen e ao número de asociados e asesorar ás mesmas para acollerse as axudas que as diferentes consellerías poñen a súa disposición anualmente. Utilización das escolas obradoiro e obradoiros de emprego para rehabilitar os locais existentes e para a construcción de outros novos.
Coas brigadas de parques e xardíns e a brigada de obras manteranse os espazos públicos das parroquias axardinados e ben coidados, recuperaranse fontes e lavadoiros e manteranse as pistas e camiños en bo estado. Extensión do PEBA, Plan de Extensión de Banda Ampla a todas as parroquias do concello no período 2007-2008.

CULTURA E DEPORTE:
Asesoramento ás asociacións culturais para solicitar as axudas institucionais para actividades e implicación do concello co proxecto da banda de Gaitas O Castro. Apoio aos grupos teatrais e achegar as súas obras aos cidadáns con representacións ao aire libre de teatro e cinema en galego nos meses de verán. Creación da Rota dos Pazos e Casas Grandes e potenciación da rota e das xornadas do romático. Dotar a biblioteca municipal de acceso a Internet e en colaboración coa dirección e a ANPA do colexio incentivar o acceso dos nenos e nenas a mesma ademáis do dos veciños e veciñas en xeral. Fomento da propia cultura a través da lectura, charlas, conferencias, excursións e premios infantís e literarios. Promoción das producións culturais e do potencial creativo dos veciños e veciñas do concello e especial colaboración cos artesáns, coas mulleres rurais que se adiquen a creatividade ou cos artistas dos diferentes ámbitos. Invantariado do patrimonio arqueolóxico do concello.
Fomento do deporte de base a través de escolas deportivas e maratóns e de hábitos de vida saudábeis entre tódos os sectores de idade do concello. Habilitación de campos para a práctica de deportes tradicionais, como os birlos que están experimentando un importante auxe. Dotar dun novo sistema de regadío e céspede e creación dun campo de entrenamento a carón do Campo do Valiño do Ferreira F.C. ademáis de dotar de asentos as gradas de tribuna, todo elo ao longo da lexislatura e cun calendario de prioridades establecido coa propia directiva do clube. Complementar os gastos de inscripción e axudas aos equipos do concello que participen en competicións deportivas. Arranxo do equipamento do pabillón polideportivo e facilidade de acceso ao mesmo para a práctica do deporte en calquera horario. Participación do concello nos viaxes que se organicen para ver competir as selecións nacionais deportivas galegas. Fomento do deporte base entre os máis cativos ca creación na medida do posible de Escolas deportivas e a organización de carreiras populares.

CONCELLO SOLIDARIO: Integración no fondo galego de cooperación e solidariedade e procurarase que a partida orzamentaria do concello adicada a cooperación e solidariedade alcance o 0,7 %. e sensibilización social en materia de acción humanitaria.

BENESTAR E IGUALDADE: Creación da concellaría de benestar social con dúas áreas; de inclusión e loita contra a pobreza e de autonomía persoal e accesibilidade. Facilitarase aos nosos maiores información sobre servizos e recursos sociais contando coas asociacións veciñais e as asociación de persoas maiores e xuvilados. Priorizarase a cobertura absoluta a aquelas persoas que sexan grandes dependentes. Asegurar o maior grao de covertura asistencial a aquelas persoas susceptíbeis de mellorar a súa calidade de vida con prestacións domiciliarias. Implantación da teleasistencia domiciliaria e a localización fóra do domicilio. Implantación no concello da rede de coidados para a autonomía persoal conectándose coa Xunta de Galiza para dispor de servizos on-line para persoas con dependencia, formación de coidadores, bolsa de emprego para profesionais dos servizos de proximidade, farmacia a domicilio, préstamo de axudas técnicas, etc. Colaboración coa vicepresidencia para a implatanción do programa “065 social”, un servizo de transporte adaptado para persoas maiores con dificultades de mobilidade e persoas con discapacidade. Posibilidade de emprego de veciños e veciñas para traballar coas persoas dependentes, transporte, comedor social ou xantar na casa, lavandería etc. Estimular a formación en dependencia aos profesionais de servizos sociais dos concellos a través de servizos de teleformación en colaboración coa vicepresidencia. Elaborarase un plano municipal para identificar as necesidades de servizos elaborar programas axeitados para resolver as demandas do colectivo. Reactivarase a construción do centro de día para que esté dispoñíbel nun prazo de ano e medio. Promocionarase a tarxeta + que permite descontos as persoas maiores de 65 anos no transporte público, exposicións, cine, actos deportivos…. Programas de turismo termal e de coñecemento do país. Creación do Consello de maiores e das relacións interxeracionais con actividades nos centros sociais e de ensino de recollida de memoria viva a través da historia oral, dos traballos, festas, oficios, acontecementos políticos, culturais, etc protagonizada por persoas maiores. Promoverase a integración social de persoas con discapacidade.
Compromiso de acadar unha igualdade plena cunha política municipal sensibel. Dende o concello traballarase activamente na sensibilización sobre a violencia de xénero adaptando conxuntamente coa vicepresidencia medidas de concienciación social e de formación para os profesionais da asistencia social e sanitaria e daráselle unha atención integral –psicolóxica, xurídica, económica e laboral- as mulleres que sufran violencia de xénero. Favorecerase a inserción laboral das mulleres, apoiarase as mulleres emprendedoras e elaboraranse planos de formación e capacitación.

MEDIO AMBIENTE E DESENVOLVEMENTO SOSTÍBEL: Implicación do concello de Pantón no proxecto de acadar a distinción de Patrimonio da Humanidade. Rematarase cos vertedeoiros de lixo incontrolados e o concello de Pantón non terá que voltar a aparecer nos medios de comunicación como un nos que aínda existen. Promocionarase a utilización do Punto Limpo de Següín para a recollida de pilas, baterías, electrodomésticos, muebles etc. Limpeza das marxes de ríos, regatos, rotas de sendeirismo e a cabalo e adopción de medidas exemplarizantes para os que non o respeten. Homoxenizarase as indicacións e sinalizacións e eliminaranse as antigas e deterioradas ademáis de dotar as parroquias de taboleiros de anuncios nos que se dará conta das distintas actividades que se realicen no concello. Priorizarase o impacto ambiental a hora de emprender calquera tipo de actuación no medio. Executaranse as redes de abastecemento de auga para asegurar a subministración a población. Garantirase a saude pública con tratamentos que aseguren a potabilidade e calidade da auga. Faranse campañas de redución, reutilización e reciclaxe e de aforro de auga e enerxía e participarase nos proxectos de mellora das infraestructuras enerxéticas da Consellería de Innovación e Industria co obxectivo de acadar un aforro enerxético no alumeado público e incentivarase a redución de residuos sólidos urbáns. Colaborarase coas comunidades de montes veciñais, coa consellería de medio rural e co voluntariado en defensa do monte galego para a prevención dos lumes. Incluirase no catálogo de árbores senlleiras da Consellería de Medio Ambiente ao Carballo da praza de Goian así como a calquera outra árbore ou formación de éstas que merezan unha especial proteción. Deseñaranse e executaranse as redes de sumidoiros con separación das pluviais e fecais. Controlarase o impacto urbanístico e o impacto para a saúde das liñas de alta tensión, soterrado das novas liñas de media tensión ao seu paso por núcleos de población e as de baixa tensión que afecten a conxustos histórico-artísticos e monumentos. Fomentarase entre os veciños e veciñas as enerxías limpas e informarase sobre as axudas e subvencións relacionadas coas mesmas e participarase nas da Consellería de Innovación para instalacións térmicas ou fotovoltaicas nos edificios públicos. Incrementar, protexer e coidar os espazos de uso público. Farase un inventariado do patrimonio medioambiental do concello e en xeral aprobaranse ordenanzas municipais de proteción do medio ambiente e recollida selectiva de lixo , dotando as parroquias dos contenedores necesarios e fomentando ese hábito entre os vecños.

MOCIDADE: Participación da mocidade no deseño das políticas que lle afecten potenciando a súa autoorganización en asociacións xuvenís que serán apoidadas desde o concello. Asumir por parte do concello a metade da matrícula dos alumnos universitarios que non reciban becas e xustifiquen un mínimo aproveitamento ademáis da metade dos seus gastos de desprazamento e tamén dos de ensinanza post-obrigatoria. Posta en marcha de escolas obradoiro para os menores de 25 anos e facilitarlle información e orientación en materia de emprego a través da oficina de información xuvenil que tamén aportará información sobre campamentos de verán e campos de traballo no país e no estranxeiro, asesoramento en temas afectivo-sexuais e información sobre as consecuencias das drogas.

COMUNICACIÓN E TRANSPORTE: Priorizarase unha política de mantemento en bo estado das actuais vías de comunicación e serase restrictivos na creación de novas vías que non estén plenamente xustificadas ou cuxo impacto ambiental non sexa asumíbel. Co fín de vertebrar o concello, construirase a estrada entre Budián e Frontón, outra das promesas incumpridas do partido popular e para minorizar o impacto ambiental discurrirá por as actuais pistas de terra sempre que sexa posíbel. Tamén se arranxará a carretera entre Tuiriz e Ferreira, co que se permitirá que os habitantes de Tuiriz non vivan completamente de costas a capital do concello, coas pérdidas económicas e de integración que eso supón. Colaborarase coa Consellería de Medio Rural, os viticultores e as súas asociacións para a mellora das pistas da ribeira e para a limpeza de camiños e das marxes das carreteras que discurren por o concello. Preparación definitiva das pontes da nacional 120 vella e do seu percorrido e arranxo do deplorábel estado das estradas entre a Santa Mariña e Guítara, entre O Barrio e A Arribada así como do firme das demáis vías que se atopan en estado lamentábel.
Integración no programa TES+BUS cando este sexa definitivo para permitir aos veciños e veciñas das parroquias desprazarse ata Ferreira nos autobuses escoloares ao prezo de 1 euro. Este servizo funcionará nos horarios e datas que funciona o transporte escolar. Apoio a recente asociación ciclista creada no concello e fomento do uso das bicicletas.

MEDIO RURAL: Elaborarase un plano municipal de infraestructuras rurais dirixidas a incentivar a actividade produtiva no rural. Impulsaremos a creación das “Unidades de Xestión Forestal” prevista na Lei de Prevención de Incendios Forestais para lograr unidades forestais dimensionadas que permitan rendibilizar o noso monte. Apoio aos proxectos impulsados polas comunidades de montes veciñais e apoio e colaboración para acadar da consellería de Medio Rural plans de ordenación forestal, creación de mancomunidades de montes ou deslindes entre comunidades e entre comunidades e particulares. Colaborarase co Banco de Terras de Galiza, Bantegal, para fomentar desde o concello a posta en valor de terras produtivas que se atopan en estado de abandono permitindo así un beneficio a arrendadores e arrendatarios que o desexen. Dar prioridade aos proxectos que xeren novas actividades económicas e creen emprego e apoio ao turismo rural e as empresas relacionadas co mesmo. Información e asesoramento das distintas axudas e subvencións das consellerías e organismos públicos. Especial colaboración coa Asociación de Viticultores de Pantón e en xeral participación cidadá no desenvolvemento do concello.

URBANISMO: Aprobarase definitivamente o tan esperado plan de ordenación municipal de Pantón no que garantiremos a prevalencia do interés público sobre o particular ou privado, coherencia coas directrices nacionais de ordenación do territorio, que haxa participación dos veciños e veciñas e que sexa transparente, sustentábel, racional e que marque un equilibrio territorial e no que se respete unha ordenación do territorio municipal, unha planificación de infraestructuras básicas, conseguir solo dotacional para equipamentos públicos e espazos libres de uso público, habilitar chan para vivenda protexida e para usos industriais e a proteción dos valores ambientais e culturais. Informar sobre as subvencións para rematar casas inacabadas e para rehabilitación de casas no rural.

INFANCIA: Despois da apertura da Galescola de Pantón por parte da vicepresidencia a prioridade será a creación dun parque infantil e dunha ludoteca en Ferreira que funcionaría nos fíns de semana. Aos pais que residan no concello daráselle unha axuda de 500 euros por cada neno que naza no concello que se sumará aos 360 euros de axuda de Vicepresidencia cando se cumpran os requisitos de ingresos marcados por ésta.